Hardis Françoys (La Prise de Calais) (Guillaume Costeley)

Hardis Françoys et furieux Normantz,
Picardz, Bretons, Gascons, et Rochelloys,
C’est à ce coup sans plus estre dormantz,
Que de Calais faut chasser les Angloys.
Tabours, clairons, bruyez faictes effroys.

Tonnez canons, renversez les rempars !
Marchons soldatz, les rempars sont espars:
Entrons dans l’eau, et passons les fossez.
Ren toy, Calais, cache tes estandars.
A mort, canaille, à mort, à mort, passez.

France par terre et par la mer aussi,
Dedens, dedens, victoire avons Françoyse.
Las je me rendz! et plus ne suis Angloise.
Nobles Françoys, ayez de moy mercy,
Sans nul bon droit l’Angloys me print icy,
Me captivant en orgueilleux lien.

Bien venu soys, car à toy j’appartien,
Roi des Françoys justement m’as conquise,
Fuy donc de moy, Angloys et ta fierté
Car c’est en vain qu’on garde la Cité,
Si le grand Roy n’en a la garde prise.